septimana latina (this week in latin)

Obama latine? Ita possumus!

2009-05-09T20:42:00.000-07:00

imago a mithridates.blogspot.com rapta est

Iam scripserunt aliqui de "ciceronianismo" orationum Baraci Obama. nuper cogitavi de versionibus latinis horum orationum et, re in interrete investigata, versiones latinas inveni, aut excerpta. exempli gratia:

"Grates agens humilissime accipio nominationem vestram, ut munus praesidentis Civitatum Unitarum petam"
(http://ephemeris.alcuinus.net/nuntius.php?id=442)

Aliquis in blogo scripsit se velle legere et audire versiones latinas orationum praesidis Obama. suntne alii qui versiones Latine aut fecerunt aut legerunt?

Valeatis!

kalendarium romanum

2009-04-28T21:46:00.000-07:00

Salvete,

Nuper aliquis in indice nostro Latin-Best Practices nuntium scripsit de indice nomine POMERIVM cuius participes recipere possunt nuntia cottidiana de die, modo Romano. exempli gratia, hodie recepi:

MMDCCLXII AB VRBE CONDITA (2009 dell'era volgare)
APRILIS
MARTIS DIES ANTE DIEM IV - F - NP
LUDI FLOREALES I DIE

etiam, saepe sequitur narratio parva Italice scripta de festis, diis celebratis in die, etc. alia nuntia interdum mittuntur de variis rebus ad Romam antiquam pertinentibus. si vultis se adiungere, videte:

http://it.groups.yahoo.com/group/pomerium/

valeatis

Ioannes

et lingua graeca antiqua viva?

2009-03-19T16:06:00.000-07:00

Fortasse audax nominavi blogum meum "septimana latina" quoniam nuper minus quam semel in mense solebam hic latin scribere. Vita turbata multa impedimenta sine dubio ponit--sed quid novi? iterum incipio.

Hodie vir qui (nisi fallor) graece antiquo modo scribit et loquitur me invitavit in situm suum graecum nomine ALPHABETUM GRAECUM. proh dolor confiteor me non posse modo vivo lingua graeca antiqua tam bene uti ut me iungam in illum situm electronicum. sed tempus erit, ut spero.

in proximum (vere!)

Ioannes

musicus optimus mortuus est

2009-01-09T15:00:00.000-08:00

Fredericus Hubbard, tubarius* optimus, septimana peracta mortuus est. Non pertinet valde ad latinitatem, sed his diebus cogitare soleo illo de viro, anglice latineque. optime scivit linguam musicam nomine "jazzensis" et, quamquam floruit in eodem tempore cum aliis tubariis optimis e.g. Miles Davis, Lee Morgan, etc., numquam tamen in umbris eorum est versatus. meo quidem iudicio, canuit compositionem extemporalem* inter optimis illius temporis, in qua sunt anima et eruditio, pathos, et ratio.

Plus quam decem abhinc annos, me tuba canente, ego cum eo locutus sum apud spectaculum parvum Franciscopoli. dixi compositionem extemporalem in cantatione Herberti Hancock nomine "Saltatio Delphini" optimum esse. sine superbia assentus est et breviter in memoria sesionem illam visitavit mecum. voluit mecum canere, sed non nobis licebat.

De latinitate eius. compositionem aliquam nominavit "Arietis" in collectione nomine "Ready for Freddie"

Requiescat In Pace

* tubarius: homo qui tuba (Eng. trumpet) canit

* compositio extemporalis: Eng. improvisation

CARTVLA NATALICIA

2008-12-24T10:59:00.000-08:00

felicem diem Christi natalis vobis omnibus exoptamus!
--Ioannes, Lyla, et Amelia Rosa.

lingua latina in vita mea

2008-12-05T21:19:00.000-08:00

Tandem aliquando novam narrationem scribo in blogo meo. nescio cur sed non inspiratus sum ad Latine scribendum his diebus. sine dubio una causa erat dubitatio de latine docendo in schola mea anno proximo. anno peracto docebam unam sectionem latinitatis ut "electiva," deinde non satis discipulorum cursum meum eligerunt hoc anno. sed strenue pugnabam ut facultatem latinitatis haberemus et post suffragium ducum facultatum variarum latinam docebo anno proximo. sed nunc sunt dificultates aliae in scholae, quae fortasse impedient latinitatem--videbimus. quidquid id est Deo gratias ago quod munus habeo in oeconomia pessima nostra.

Anno MMII apud Reginaldum Foster Romae, emi libros latine scriptos nomine LITVRGIA HORARVM. amicus monachus mecum erat in bibliopola vaticana, qui mihi dixit vestimenta eius significare pretii librorum decessionem. quam ob rem nunc quattuor volumina pulchra utiliaque habeo in bibliotheca mea. soleo praecipue in temporibus sanctis illos libros perlegere meditarique. magnopere hos libros commendo omnibus (non tantum Catholicis) qui volent multa latine legere sine multa difficultate post primos annos latinitatis studii. precationes, hymni lectionesque bibliae vulgatae atque ecclesiae patruum continentur, et discipuli non debebunt semper lexicon inspicere ad intelligendum.

Ergo, videtur quod latinitas (et narrationes in blogo) crescet in vita mea propter muneris spem et studium meum, sed gradatim.

cave cenam!

2008-08-27T13:33:00.000-07:00

(Participes: Brianus, ego, Ioannes Altus, Karola, Gertrudis, Henricus Atticus, Stephanus, Katherina, Christopherus, Seth)

Die saturnii cena sorbillationeque optima fructi sumus multis cum amicis. feliciter, in regione versatus est amicus noster Stephanus Berard vasingtonianus magister peritissimus. cena nuntiata, turba apparuit ad cenandum et latine loquendum, ut videri potest in imagine. de variis rebus sumus locuti plusquam duas horas. convenimus inprimis apud cafeum Berkleiae, deinde multi participum ad popinam indicam ambulaverunt ad cenam pergerendam, me absente. gratias plurimas omnibus participibus ago, et spero ut mox conveniamus.

liber apertus

2008-08-17T09:23:00.000-07:00

Abhinc duas septimanas ego uxor filiaque Minneapolin petimus ad familiam visitandam. quamquam plerumque avunculi consobrinique nostri regiones suburbanas colunt in domibus magnis iuxta lacus amoenos, diem unum in urbe sumus versati. intinere peracto tabernam chartariam (vocabulum inveni hic) vidimus nomine Lunalux, ubi venduntur chartae stili librique pulchri. ut mihi videtur, Minneapolis est vere centrum horum artium. quam ob rem non miror videre aedificium ad artes libri dedicatam, in quo homines possunt libros optimos videre emere et facere.

Etiam, in urbe comedimus pittam optimam neapolitanam authenticam apud popinam nomine Punch. coqui illic cum artificibus neapolitanis studere solent, quod valde apparet. etiam, praebentur acetaria bona et vinum italicum vilis pretii. iter optimum fuit!

sollicitudines solitudinis

2008-05-30T13:46:00.000-07:00

In nostra traditione philosophica ac theologica, semper laudatur solitudo, id est, fugium a hominum turbā, quia, ut dicunt, facile homines corrumpentur ab aliis. rationem valde habent, quia solemus nos ipsos fugere, aliis adiuvantibus. Thomas a Kempis verba Senecae ipsius usurpavit, dicens:

"dixit quidam [i.e. Seneca]: quoties inter homines fui, minor homo redii... qui igitur intendit ad interiora et spiritualia pervenire, oportet eum cum Iesu a turba declinare." (De Imitatione Christi I, 20, 2)

sed contra, definitio hominis est animal commune (cf. Aristoteles, politikon zōon), ergo societas non potest esse omnino nobis mala. verba sapientiae plena nuper legi in altera epistola Senecae:

"omnis nobis mala solitudo persuadet.... nemo est, cui non satius sit cum quolibet esse quam secum. 'tunc praecipue in te ipse secede, cum esse cogeris in turba' si bonus vir, si quietus, si temperans. alioquin in turbam tibi a te recedendum est; istic malo viro propius es." (ep. XXV)

sine dubio, haec res simplex non est. traditio latina philosophica praebet nobis sententias optimas ut bene cogitemus. olim amicus quidam mihi dixit philosophiam Romanam esse oxymoron. sed, litteris perlectis a Seneca Cicerone marcoque aurelio et aliis, discerni potest nova traditio philosophica ET eloquens ET utilis. Etiam, de litteris a Marone, Horatio Lucretioque optime scriptis nondum scripsi!

Valeatis!

de codicillo meo

2008-05-23T14:48:00.000-07:00

Quid significat "codicillus"? est libellus parvus et portabilis in quo homines scribunt. alia vocabula sunt: fasciculus, chartae compactae, chartulae, et cetera, sed placet codicillus. ecce descriptio in thesauro Gesner:

"Recte igitur P. Manutius, codicilli tabellae cereatae erant, in quibus aliquid stilo aut breviter aut festinanter scriptum fuerat. itaque commodissime iis veteres utebantur, cum scribere in codicillis possent vel in coena, vel in curia, vel in via, vel ubiumque libuisset: charta autem non item, in qua scribere sine atramento et calamo non poterant" (p.978).

Commentarios meos in blogo inprimis rare scribo in computatrum. facilius est cum stilo atque carta scribere quandocumque verba in buccam veniunt. non est tempus ad computatrum tollendum et surrigendum. etiam, non semper licet mecum machinamentum habere. solebam versiones primas operum meorum in codicillis variis, sicut codicillus popularis nomine Moleskine, sed saepe de rebus variis scribo, nesciens quot paginarum scribam aliqua de re. non licet paginas movere, et nimis magni sunt codicilli "anulorum trium" neque placent, quoniam paginae facile perdi possunt. nuper inveni codicillum, aut sustema codicillorum nomine Myndology cuius paginae coniunguntur anulis parvis. hoc in libello, tres aut quattuor incepta nunc facere possum sine anxietate, quoniam facile est paginas movere ad sectionem augendam decrescendamve. est ordinatrum verum meum. non maximi pretii. cartulae optimae sunt colore lineis copertaque. etiam carta spoliata* vel re-usata est, si emis codicillum "nudum" de quo legere potes hic.

una res tantum mihi displicet: verba "cogitasti bene" aut "bene cogitare" post ultimam paginae lineam, quae

semper stilo meo delere soleo. utinam ego discipulus in universitate hos libellos invenissem!

* spolia: aedificiorum partes raptae ab aedificiis antiquis et iterum usurpatae. quam ob rem, adiectivum "spoliatus, a, um" finxi pro "recycled."

de servitudine ab hominibus electa

2008-05-22T12:26:00.000-07:00

Sententiae ad nos hodiernos valde pertinentes a Senecā philosopho scriptae:

"Ita est, Lucili; paucos servitus, plures servitutem tenent.... nemo cum sarcinis enatat. emerge ad meliorem vitam propitiis dis, sed non sic, quomodo istis propitii sunt, quibus bono ac benigno vultu mala magnifica tribuerunt, ad hoc unum excusati, quod ista quae urunt, quae excruciunt, optantibus data sunt" (Epist. Mor. XXII)

Ut clare ac vere scripsit Seneca, multi homines non inviti tenentur in servitudine, non ab aliis, sed a seipsis. semper quaerented res pretiosas, famam, pecuniam, et cetera. nos dedimus dominis variis et libertatem veram perdimus. ut alibi scripsit in eadem epistola, homines "mercedem miseriarum amant, ipsas [miserias] execrantur." culpandi non sunt di, si benigne dant nobis has miserias a nobis rogatas, id est, vitam tribuunt necessariam ad praemia habenda. quam ob rem Socrates philosophus nos hortatur ne aliquid nisi bonum ipsum rogemus a diis:

"Zeu basileu, ta men esthla, kai euchomenois kai aneuktois,

Ammi didou, ta de deila kai euchomenois apalexein" (Plato Alc. II 143a).

Valerius Maximus sententiam Socratis Latine illustrat:

Socrates, humanae sapientiae quasi quoddam terrestre oraculum, nihil ultra petendum a dis inmortalibus arbitrabatur quam ut bona tribuerent, quia ii demum scirent quid uni cuique esset utile, nos autem plerumque id uotis expeteremus, quod non inpetrasse melius foret: etenim densissimis tenebris inuoluta mortalium mens, in quam late patentem errorem caecas precationes tuas spargis! diuitias adpetis, quae multis exitio fuerunt: honores concupiscis, qui conplures pessum dederunt: regna tecum ipsa uoluis, quorum exitus saepe numero miserabiles cernuntur: splendidis coniugiis inicis manus; at haec ut aliquando inlustrant, ita nonnumquam funditus domos euertunt. desine igitur stulta futuris malorum tuorum causis quasi felicissimis rebus inhiare teque totam caelestium arbitrio permitte, quia qui tribuere bona ex facili solent, etiam eligere aptissime possunt (Factorum et Dictorum Memorabilium Libri, 7.2).

sine dubio sunt multi pauperi in patria nostra quibus servitudo electa non est. aliqui tamen querelas semper faciunt propter res a seipsis electas. volunt cum sarcinis, idest, cum vehiculo ludi usūs (SUV) et villā magnā et aliis praemiis vitae negotiosae, natare ad finem. sed natare non possunt propter istud pondus. praecipue nefas est ista vita quia permulti difficultatibus veris neque electis laborant.

birota

2008-05-19T20:22:00.000-07:00

Si paginam domesticam electronicam inspicitis (www.johnpiazza.net), videbitis me birotarum amatorem esse. birota est machinamentum optimum quo homines se vehere possunt celeriter--viribus suis. difficultates adulescentiae fugavi in collibus silvisque californianis. quamquam aliquos annos certavi, his diebus mihi placet itinera facere lentiter aut in hortis publicis aut in urbe erranda faciens sine autoraeda. in imagine, particeps sum in itinere magno nomine "iter curae" quod collegit pecuniam pro societate americana diabetes. amicus qui isto morbo laborat rogavit me participare secum hoc anno, quod feleciter feci. L millia passus birotam gubernavi in "regione vini" nomine Napa, ubi multi vinetarii uvas colunt et vinum faciunt. est locus pulcher.

Sed quid de latinitate? nuper recepi nuntium electronicum latine scriptum ab italo Fabricio Spegis qui non solum peritissimus in rebus classicis ac archiologicis, sed etiam solet birotam suam gubernare in vicinitate. excerptam epistolae eius vide:

Ego sermonem italicum vulgarem, linguam latinam et historiam apud Lyceum grammaticum (idest schola ubi discuntur sermones hodierni anglice, francogallice, germanice hibericeque) doceo, in parva urbe Italiae superioris ubi cum familia mea vivo. Non longe ab urbe mea, X milia circiter, vestigia, reliquiae et ruinae sunt antiqui oppidi romani, de quo Plinius senior mentionem facit (Naturalis historia, III, 14); haec civitas olim appellabatur latine "Industria": hic inveniuntur rudera non solum insularum, viarum domuumque, sed etiam templi deae Isidi dicati; haec sacra aedes, quae Serapeum dicitur, aedificata fuit II saeculo p. C.n. ab Hadriano imperatore, at origines illius urbis antiquiores sunt, nam videtur condidisse II saeculo a.C.n., cum Romani Transpadanam regionem occupaverunt. Si tua interest aliquid de Industria cognoscere, vide:

http://www.piemonte.beniculturali.it/index.php?/ln/it/id_p/165.html

http://www.chlt.org/sandbox/perseus/pecs/page.2082.a.php

http://www.archeologia.beniculturali.it/pages/atlante/S120.html

Aliquando, operam meam do pro effossionibus, non solum in isto loco, sed etiam alibi: nam ut archaeologus ad effossiones in Sicilia, Syracusis et Selinunte; in Calabria (olim Brutium), Locris interfui. Ut tibi scripsi, palaeographiam quoque colo: in tabulario communitatis meae asservantur nonnullae membranae et chartae saeculorum XII, XIII et XIV, quas studeo et verto; charta antiquissima initium capit ab anno MCLVI p.C.n.

gaudeo in commercio amicitiaque nostra nuper incepta.

TLS et philologus germanicus

2008-05-14T15:39:00.000-07:00

Aliquos abhinc menses in ephemeride nomine Times Literary Supplement narrationem legi de Augusto Wilhelm Schlegel. fortasse me interrogatis: "quomodo pertinet ad linguam latinam?" quoniam Augustus, minus notus quam frater nomine Friedrich, operam tamen valde dedit ad res philologicas. praecipue ille tulit litteras Sanskritas ad Europam. dum legi, statim cogitavi de editione latina carminis Indici nomine Baghavad Gita, quam inveni in bibliotheca universitatis Berkleiensi et cum gaudio perlegi.

Ego magister linguae latinae semper in animo volvere soleo de luduo perfecto et quomodo possim optime docere linguam litterasque. velim magnopere non solum litteras latine scriptas, sed litteras totius mundi LATINE legere cum discipulis. sed inprimis, necesse est invenire (aut vertere) litteras praeclaras variarum tradtitionum. multa iam exstant, exempli gratia commoedium divinum Dantis, tractationes philosophicae Confucienses, opera Platonis, epica Finnica Kalevala, et cetera. docti qui has litteras transtulerunt sine dubio cogitaverunt de commercio magno inter homines qui multas terras incolunt. forsitan somnium est, sed bonum.

Etiam, in hac editione TLS, scribitur narratio de vita et libro biographico vir docti nomine Gilbertus Murray, et quomodo non solum litteras classicas, sed etiam condicionem pacis inter varias patrias curare voluit. ut is bene cognovit, litterarum classicarum studium non solum ad tempud praeteritum sed praesentum pertinet. Valeatis!

Aloisius Miraglia Latine loquitur

2008-05-13T15:19:00.001-07:00

nuper amicus meus Patricius Twomey catenas mihi misit. licet videre et audire hominem tam benignum peritissimumque latine loquentem de vita eius et de latinitate. eum primum inveni anno MMIV apud conventiculum Kentuckianum et, anno postero, cum eo et discipulis versatus sum duos dies. de itinere lege hic: www.johnpiazza.net/iterlatinum05

sunt octo partes. vide primam partem infra, quae est introductio.

in initio...

2008-05-12T20:39:00.000-07:00

Ioannes Piazza lectoribus optimis salutem plurimam dicit.

bene venistis ad narrationem meam latinam. "septimana latina" nuncupatur quia saepe nequeo plus quam semel in hebdomada (=septimana) narrationem latinam facere propter vitam meam turbatam (de qua multa pro certo scribam). etiam, mundus latinus hodiernus (qui exstat!) non tam agitatur ut possim cottidie narrare de rebus novis. ergo, conabor hic nuntia de rebus quae accidere soleant in una septimana, vel de rebus latinis meis, vel de rebus latinis in toto orbe terrarum. quam ob rem, vos omnes invitare velim ut mihi scribatis de rebus latinis a vobis auditis, et cum gaudio faciam ut narrationes meae crescant gradatim, omnibus aduivantibus. valeatis!